भोटेकोशी बाढी : मृतकको संख्या १ हजार २९३ पुग्यो, ४ हजार ८९८ अझै बेपत्ता

काठमाडौं– रसुवाको भोटेकोशीमा आएको विनाशकारी बाढीका कारण विभिन्न जिल्लामा हालसम्म १ हजार २९३ जनाको शव फेला परेको छ। केन्द्रीय प्रहरी प्रवक्ता अविनारायण काफ्लेका अनुसार आज अपराह्नसम्म रसुवा, नुवाकोट, धादिङ, चितवन, गोरखा, तनहुँ, नवलपरासी पूर्व तथा पश्चिम र भारतमा समेत शव फेला परेका हुन्।

प्रहरीका अनुसार रसुवामा १४०, नुवाकोटमा १८६, धादिङमा ६५, चितवनमा ३५९, गोरखामा ७२, तनहुँमा ३८, नवलपरासी पूर्वमा २२१ र नवलपरासी पश्चिममा १९४ शव फेला परेका छन्। भारतमा भेटिएका तथा नवलपरासी पश्चिममा बुझाइएका १८ शवसमेत जोडिएको छ।

बाढीबाट घाइते भएकामध्ये दुई जनाको उपचारका क्रममा मृत्यु भएको छ। उनीहरूमध्ये एक जनाको टिचिङ अस्पताल र अर्का एक जनाको राष्ट्रिय ट्रमा सेन्टरमा मृत्यु भएको प्रहरीले जनाएको छ।

फेला परेका शवको पहिचानका लागि डिएनए नमुना सङ्कलनलगायत आवश्यक प्रक्रिया पूरा गरी हालसम्म १ हजार ३० वटा शव व्यवस्थापन गरिएको छ। व्यवस्थापन गरिएका शवमध्ये २२२ महिला, ३५५ पुरुष र ४५३ जनाको पहिचान खुल्न बाँकी रहेको छ।

शव पहिचानका लागि मृतकका परिवारबाट १ हजार २६० तथा आफन्तबाट ८४६ गरी २ हजार १०६ वटा डिएनए नमुना सङ्कलन गरिएको छ। पहिचान हुन नसकेका १ हजार २६३ शवको विवरण नेपाल प्रहरीको वेबसाइटमा राखिएको प्रवक्ता काफ्लेले जानकारी दिए।

बाढी प्रभावित क्षेत्रमा उद्धार, खोजी, राहत वितरण तथा शव व्यवस्थापनका लागि हालसम्म ७ हजार ९१२ प्रहरी कर्मचारी परिचालन गरिएको छ।

प्रहरीका अनुसार हालसम्म ४ हजार ८९८ जना बेपत्ता छन्। उनीहरूको खोजी कार्य जारी रहेको छ। विभिन्न जिल्लामा रहेका होल्डिङ सेन्टरमा ३ हजार ६५५ जनालाई राखिएको छ।

प्रहरीले बाढीको जोखिममा रहेका परिवारलाई सुरक्षित स्थानमा स्थानान्तरण गर्नुका साथै विभिन्न निकाय र स्थानीयवासीसँगको समन्वयमा उद्धार तथा खोजी कार्य गरिरहेको छ। बाढीका कारण अवरुद्ध भएका विभिन्न सडक तथा बाटो खुलाउने कामसमेत जारी रहेको प्रहरीले जनाएको छ।