काठमाडौँ– नेपाल नेत्रज्योति सङ्घले रसुवास्थित भोटेकोशी नदीमा आएको बाढीबाट प्रभावित नागरिकको उद्धार, राहत तथा पुनःस्थापनाका लागि प्रधानमन्त्री दैवी प्रकोप उद्धार कोषमा एक करोड ४१ लाख ४१ हजार १४१ रुपैयाँ सहयोग गरेको छ ।
सङ्घका महासचिव भरतबहादुर चन्दले बुधबार अर्थमन्त्री डा. स्वर्णिम वाग्लेलाई उक्त रकमको चेक तथा भौचर हस्तान्तरण गर्नुभयो ।
गैरनाफामुखी सामाजिक संस्थाको सञ्जालअन्तर्गतका अस्पताल, आँखा उपचार केन्द्र तथा जिल्ला शाखालगायत संस्थागत स्रोतबाट ९९ लाख ७४ हजार ५०६ रुपैयाँ र कर्मचारी तथा स्वयंसेवकबाट ४१ लाख ६६ हजार ६३५ रुपैयाँ सङ्कलन गरिएको सङ्घले जनाएको छ ।
यही भदौ १० गते भोटेकोशीमा आएको बाढीबाट रसुवा, नुवाकोट र धादिङमा ठूलो मानवीय तथा भौतिक क्षति भएको थियो । बाढी प्रभावित नागरिकको दैनिक जीवन, स्वास्थ्य तथा जीविकोपार्जनमा परेको गम्भीर असरलाई मध्यनजर गर्दै सरकारले आह्वान गरेको उद्धार कोषमा सहयोग गर्ने निर्णयअनुसार रकम सङ्कलन गरिएको सङ्घले जनाएको छ ।
सङ्घअन्तर्गत सञ्चालित विभिन्न अस्पताल तथा आँखा उपचार केन्द्र, जिल्ला शाखा, समाजसेवी, शुभेच्छुक तथा कर्मचारीबाट प्राप्त व्यक्तिगत सहयोगसमेत एकीकृत गरी उक्त रकम कोषमा जम्मा गरिएको हो ।
आर्थिक सहयोगसँगै सङ्घले विपद् प्रभावित नागरिकको स्वास्थ्य आवश्यकतालाई समेत प्राथमिकतामा राखेको जनाएको छ । प्रभावित क्षेत्रमा निःशुल्क आँखा परीक्षण, उपचार तथा परामर्श सेवा उपलब्ध गराउने कार्यलाई निरन्तरता दिइएको सङ्घले जनाएको छ ।
सङ्घका कार्यकारी निर्देशक डा. शैलेश मिश्रले भोटेकोशी बाढी प्रभावितको उद्धार, राहत तथा पुनःस्थापनामा सरकारले गरिरहेको प्रयासप्रति ऐक्यबद्धता जनाउँदै आगामी दिनमा पनि आवश्यकता र परिस्थितिअनुसार मानवीय सहयोग तथा स्वास्थ्य सेवा प्रवाहलाई निरन्तरता दिने बताउनुभयो ।
महासचिव चन्दका अनुसार सङ्घले हालसम्म पाँच करोड दुई लाख ४८९ जनालाई आँखा उपचार सेवा प्रदान गरिसकेको छ भने ५६ लाख ५९ हजार ६२४ जनाको आँखाको शल्यक्रिया गरिसकेको छ ।
सङ्घले हाल २८ वटा आँखा अस्पताल र ४४ जिल्ला शाखाअन्तर्गतका २२६ आँखा उपचार केन्द्रमार्फत नेपालीसहित विभिन्न देशका नागरिकलाई आँखा उपचार सेवा प्रदान गर्दै आएको जनाएको छ ।
