‘मासु–भात र खाममा पैसा लिनेहरू’ भनेपछि आफ्नै मतदाताको प्रश्न– फेसबुकमा होइन, काम गरेर देखाउनुस् सांसदज्यू!

काठमाडौं– राष्ट्रिय स्वतन्त्र पार्टी (रास्वपा)का उदयपुर क्षेत्र नम्बर १ का प्रतिनिधिसभा सदस्य पारसमणि गेलाल पछिल्लो समय आफ्ना अभिव्यक्ति र सामाजिक सञ्जालका पोस्टका कारण पुनः विवाद र चर्चामा आएका छन्। निर्वाचन भएको केही महिनामै मतदातासँग पटकपटक सवाल–जवाफमा परेका गेलालले यसपटक आफ्ना आलोचकलाई लक्षित गर्दै गरेको फेसबुक पोस्टपछि थप आलोचना खेप्नुपरेको छ।

गत साउन ९ गते जिल्लामै मतदातासँग भएको तितो–मिठो संवादमा उनलाई स्थानीयले ‘चाउचाउको कुपनमा परेको सांसद’ सम्म भनेका थिए। अहिले भने गेलालले आफ्ना आलोचकलाई विगतमा ‘चिया, बिस्कुट, मासु, भात र खाममा पैसा’ लिनेहरू भन्दै टिप्पणी गरेका छन्।

आइतबार सामाजिक सञ्जालमार्फत मतदातालाई सम्बोधन गर्दै उनले आफूलाई विश्वास गरेर निर्वाचित गराउने जनताको शिर झुक्ने काम कहिल्यै नगर्ने दाबी गरे। उदयपुरको भौतिक, शैक्षिक तथा पर्यटकीय विकासका लागि कनेक्टिभिटी विस्तारमा आफूहरू केन्द्रित रहेको उनको भनाइ छ।

गेलालले लेखेका छन्, ‘आदरणीय मतदाताज्यूहरूको विश्वासको मतले हजुरहरूको शिर झुकाउने दिन कदापि आउन्न, बरू हिजो विश्वास गर्न नसक्नु भएका इमान्दार र बौद्धिक मतदाताहरूले विश्वास गर्ने दिन आउनेछ।’

आफूविरुद्ध भइरहेको आलोचनालाई उनले ‘डाहा’को संज्ञा दिँदै उदयपुरको विकास गरेरै छाड्ने दाबी पनि गरेका छन्।

उनले लेखेका छन्, ‘डाहा गरेर छाती भतभत पोले पनि उदयपुरको भौतिक, शैक्षिक, पर्यटकीय विकासको लागि कनेक्टिभिटीको उच्च विकास गरेरै छाड्छौँ।’

तर, त्यसपछि गरिएको उनको अर्को टिप्पणीले सामाजिक सञ्जालमा बहस झन् चर्किएको छ। उनले विगतमा राज्यको दोहन गरेर भ्रष्टाचार गर्ने र निर्वाचनका बेला विभिन्न प्रलोभनमा पर्नेहरू अहिले आफूविरुद्ध उत्रिएको आरोप लगाएका छन्।

‘हिजोको दिनमा राज्यको दोहन गरेर भ्रष्टाचार गरी चिया, बिस्कुट, मासु, भात र खाममा पैसा पाएकाहरू आज ४ महिना नबित्दै विरोधमा उत्रन्छन्, ढुक्क हुनुस् अब ती दिन गए, बरू आफ्नो कर्ममा लाग्नुस्,’ उनले लेखेका छन्।

मतदाताको जवाफ– ‘स्टाटसले होइन, कामले देखाउनुस्’

गेलालको पोस्टमा आएका प्रतिक्रियाले भने सांसदलाई थप असहज बनाएको देखिन्छ। धेरै मतदाताले सामाजिक सञ्जालमा लगातार स्टाटस लेख्नुभन्दा प्रत्यक्ष देखिने विकासका काम गर्न सुझाव दिएका छन्।

लिलबहादुर बस्नेतले अर्को नेता गाउँघर हिँडेको वा विकास र समस्या समाधानका विषयमा बोलेको देखेर हरेक दिन सामाजिक सञ्जालमा स्टाटस लेखिरहन आवश्यक नरहेको टिप्पणी गरेका छन्।

‘माननीयजी, अर्को नेता गाउँघर हिँडेको देखेर, अर्कोले विकास/समस्या समाधानको कुरा गरेको देखेर हरेक दिन स्टाटस हाल्नु पर्दैन। तपाईं विकासका काममा लाग्नु र परिणाम देखिने गरी निकाल्नु,’ उनले लेखेका छन्।

उनले अरूलाई पैसा, मासु–भात र बिस्कुटको आरोप लगाउँदा आफूलाई पनि विगतमा **‘चाउचाउ’**सँग जोडेर टिप्पणी गरिएको स्मरण गराउँदै सांसदको मर्यादा कायम राख्न सुझाव दिएका छन्।

‘अरूलाई पैसा, मासुभात, बिस्कुटभन्दा तपाईंलाई पनि चाउचाउ भने अस्ति, फेरि भन्छन्। त्यसैले कम्तीमा सांसदको मर्यादा र ओजमा बस्नुस्,’ बस्नेतले लेखेका छन्।

गीता बस्नेतले पनि स्टाटस लेख्नुभन्दा काम गरेर देखाउन सुझाव दिएकी छन्।

‘स्टाटस मात्र पोस्ट नगर्नुस्, माननीयज्यू ! विकास र काम देखाउनु अनि मात्र पोस्ट गर्नुस्। कामले देखाउँछ कसले के गर्‍यो, गरेन भन्ने कुरा,’ उनको टिप्पणी छ।

त्यस्तै, बृष राईले गेलालको दाबीप्रति व्यङ्ग्य गर्दै लेखेका छन्, ‘नपत्याऊँ, खुट्टी हेरेरै थाहा भइसकेको छ नेताज्यू।’

‘फेसबुकको भित्तामा लेखेर विकास हुँदैन’

उदयपुरको चौदण्डीगढी नगरपालिका–८ लगायतका वडाको सडक स्तरोन्नतिका लागि पहल के भइरहेको छ भनेर पनि मतदाताले प्रश्न उठाएका छन्।

लङ्गाली नारा हाफले विगतमा उदयपुरबाट निर्वाचित दिग्गज सांसदहरूले समेत भौतिक विकासमा पर्याप्त ध्यान नदिएको उल्लेख गर्दै गेलालको कार्यकालमा जनताले परिवर्तनको अनुभूति गर्न पाउने अपेक्षा व्यक्त गरेका छन्।

ओमकुमार जम्मकट्टेलले आलोचनालाई स्वीकार गरेर कामबाट जवाफ दिन सुझाव दिएका छन्।

‘माननीयज्यू, फेसबुकको भित्तामा लेखेर विकास हुँदैन, काम गरेर देखाउनुपर्छ। विकास गर्नुभयो भने परिणाम आफैँ बोल्छ, तपाईंले बोलिरहनु पर्दैन,’ उनले लेखेका छन्।

राजन कार्कीले पनि ‘काम गरेर देखाउनु, फेसबुकमा स्टन्टबाजी गरेर हुँदैन सांसदज्यू, जनताले मूल्यांकन गर्नेछन्’ भन्दै टिप्पणी गरेका छन्।

चार महिना नबित्दै पटकपटक विवाद

गेलाल निर्वाचित भएको लामो समय नबित्दै विभिन्न अभिव्यक्तिका कारण चर्चामा आइरहेका छन्। गत साउन ९ गते उदयपुरमै स्थानीय नागरिकसँग भएको संवादको भिडियो सामाजिक सञ्जालमा भाइरल भएको थियो।

भिडियोमा एक युवकले गेलालतर्फ लक्षित गर्दै ‘चिठ्ठामा परेको माननीय हो तपाईं, चाउचाउको कुपनमा परेको हो’ भन्दै प्रश्न गरेका थिए। उक्त टिप्पणी सुनेपछि गेलाल हाँसेका थिए।

त्यसपछि अर्का युवकले ‘तपाईं भ्युजका लागि कुद्नुभएको हो, हामीलाई भ्युजका लागि भन्ने?’ भन्दै प्रश्न गरेका थिए। गेलालले जवाफमा ‘भ्युजकै लागि हो भाइ तिमी’ भनेका थिए।

यसअघि पनि उनले सार्वजनिक कार्यक्रममा काम नगर्ने मेयरलाई सरुवा गर्नुपर्ने आशयको अभिव्यक्ति दिएका थिए। उक्त भिडियो भाइरल भएपछि पक्ष र विपक्षमा बहस भएको थियो। पछि गेलालले आफ्नो भनाइको आशय तोडमोड गरिएको स्पष्टीकरण दिएका थिए।

अब सांसद गेलालको अग्निपरीक्षा

व्यावसायिक पृष्ठभूमिबाट राजनीतिमा आएका गेलाल विद्युतीय सवारीसाधन तथा अटोमोबाइल क्षेत्रसँग जोडिएर चिनिएका व्यक्ति हुन्। उनले केही समय पत्रकारिता तथा सुशासनका क्षेत्रमा पनि काम गरेको बताइन्छ।

तर राजनीतिमा प्रवेश गरेपछि उनको कामभन्दा अभिव्यक्ति बढी चर्चामा आउने गरेको देखिन्छ। पछिल्लो फेसबुक पोस्टमा उनले आलोचकलाई ‘मासु, भात, बिस्कुट र खाममा पैसा’ खानेहरूसँग जोडेर जवाफ दिएका छन्।

तर मतदाताको प्रतिक्रियाले भने एउटा स्पष्ट सन्देश दिएको देखिन्छ—उदयपुरका जनताले अब फेसबुक स्टाटस र आरोप–प्रत्यारोपभन्दा सडक, शिक्षा, पर्यटन, कनेक्टिभिटी र प्रत्यक्ष देखिने विकासको परिणाम खोजिरहेका छन्।

गेलालले भविष्यमा विकासको हिसाब दिने बताएका छन्। अब उनको वास्तविक चुनौती सामाजिक सञ्जालका दाबीलाई उदयपुरको धरातलमा देखिने परिणाममा बदल्नु नै हुनेछ।