एक महिनादेखि झापामा बसेको २२ वटा हात्तीको हुल भारततर्फ फर्कियो

झापा– जिल्लाका विभिन्न सामुदायिक वनमा करिब एक महिनादेखि डेरा जमाएर बसेको २२ वटा हात्तीको समूह आज बिहान भारततर्फ फर्किएको हात्ती अभियन्ता शङ्कर लुईटेलले जानकारी दिएका छन् ।

बच्चासहितको उक्त हात्तीको हुलले बाहुनडाँगी, शान्तिनगरलगायत आसपासका क्षेत्रमा दैनिकजसो उपद्रव गर्दै आएको थियो । हात्तीले स्थानीयका घर भत्काउने, खेतमा पाक्न लागेको धान खाने तथा कुल्चिएर नष्ट गर्ने र सुपारीका बोट भाँच्ने गरेपछि झापाका उत्तरी–पूर्वी क्षेत्रका बासिन्दा लामो समयदेखि त्रासमा बस्न बाध्य थिए ।

एक महिनापछि भारतबाट आएको ठूलो हात्तीको हुल आफ्नै प्राकृतिक बासतर्फ फर्किएपछि स्थानीयवासीले राहत महसुस गरेका छन् । स्थानीय नीलकण्ठ तिवारीले हात्तीको हुल फर्किएपछि केही हदसम्म भए पनि स्थानीयमा रहेको त्रास कम भएको बताए ।

यद्यपि, आज बिहान बिर्तामोड नगरपालिका–७ मा एउटा एक्लो हात्ती बस्तीमा पसेपछि स्थानीयवासी पुनः त्रसित बनेका थिए । बिहानै घरआँगनमा हात्ती देखिएपछि स्थानीय भागाभाग गर्न बाध्य भएका थिए ।

बस्तीमा करिब चार घण्टा घुमेको उक्त हात्ती त्यसपछि बुटाबारीस्थित चियाबगानतर्फ लागेको पत्रकार पुष्प बरालले जानकारी दिए ।

झापामा भारतको आसाम तथा पश्चिम बङ्गालका जङ्गलबाट मेची नदी तरेर हात्तीहरू खाना र बासको खोजीमा बाहुनडाँगी हुँदै नेपाल प्रवेश गर्ने गर्छन् ।

स्थानीय तिवारीका अनुसार नेपाल–भारत सीमामा लगाइएको सोलार फेन्सिङ (बिजुलीको झट्का दिने तारबार) पुरानो र जीर्ण हुँदै गएकाले हात्तीहरू सजिलै नेपालतर्फ प्रवेश गर्ने गरेका छन् ।

झापामा वर्षेनि हात्तीको आक्रमणबाट सर्वसाधारणले ज्यान गुमाउनुका साथै लाखौँ रुपैयाँ बराबरको अन्नबाली तथा धनमालमा क्षति हुने गरेको छ ।