काठमाडौं– प्रतिपक्षी नेपाली कम्युनिष्ट पार्टीका नेता एवं पूर्वअर्थमन्त्री वर्षमान पुनले प्रधानमन्त्री बालेन्द्र शाहसँग भेटवार्ता गरेका छन्।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा बिहीबार भएको भेटमा रसुवाको भोटेकोशी नदीमा आएको बाढी तथा त्यसपछिको खोज तथा उद्धार, उपचार र राहत वितरणलगायत विषयमा छलफल भएको जनाइएको छ।
भेटमा बाढीबाट प्रभावित पूर्वाधारलाई कसरी पुनः सञ्चालनमा ल्याउने तथा प्रभावित क्षेत्रको पुनःस्थापना र पुनर्निर्माणलाई प्रभावकारी बनाउने विषयमा पनि कुराकानी भएको बताइएको छ।
प्रधानमन्त्री शाहसँग यसअघि उज्यालो नेपाल पार्टीका अध्यक्ष कुलमान घिसिङले पनि भेट गरेका थिए। उक्त भेटमा पनि भोटेकोशी बाढीबाट प्रभावित क्षेत्रमा उद्धार, राहत तथा पुनःस्थापनाका साथै समसामयिक विषयमा छलफल भएको थियो। १० गते आएको विनाशकारी बाढीपछि प्रधानमन्त्री शाहले राजनीतिक दलका नेताहरूसँग भेटघाटलाई तीव्रता दिएका हुन्। सरकारको तर्फबाट अहिलेसम्म सर्वदलीय बैठक आयोजना हुन नसकेको अवस्थामा प्रधानमन्त्रीले व्यक्तिगत रूपमा विभिन्न दलका नेताहरूसँग भेट गरी बाढी प्रभावित क्षेत्रको अवस्था र सरकारको आगामी कदमबारे छलफल थालेका छन्।
पछिल्लो भेटघाटलाई बाढीबाट प्रभावित क्षेत्रको उद्धार, राहत, पुनःस्थापना तथा क्षतिग्रस्त पूर्वाधार पुनः सञ्चालनका लागि राजनीतिक तहमा समन्वय बढाउने प्रयासका रूपमा हेरिएको छ।
