काठमाडौँ — भोटेकोशीमा आएको विनाशकारी बाढीपहिरोबाट प्रभावित नेपालमा खोज, उद्धार तथा राहत अभियान जारी रहँदा भारतले आफ्नो सहयोग थप विस्तार गरेको छ। भारतले आइतबार भारतीय वायुसेनाको चौथो विमानमार्फत ११ टन राहत सामग्रीसहित विशेष प्राविधिक तथा फरेन्सिक टोली काठमाडौँ पठाएको हो।
पछिल्लो खेपमा बाढी तथा पहिरोका कारण क्षतिग्रस्त संरचनामा फसेका व्यक्तिको खोजीका लागि सुरुङ उद्धारसम्बन्धी विशेषज्ञ टोली र आवश्यक उपकरण ल्याइएको छ। त्यस्तै, पहिचान हुन नसकेका शवको पहिचान तथा डीएनए परीक्षणमा सहयोग पुर्याउन फरेन्सिक विशेषज्ञ र आवश्यक उपकरण पनि नेपाल ल्याइएको भारतीय पक्षले जनाएको छ।
राहत सामग्रीतर्फ कम्बल, स्लिपिङ ब्याग, त्रिपाल, प्लास्टिक सिट तथा हाइजिन किटलगायतका सामग्री समावेश छन्। यसअघि भारतले नेपालमा औषधि, खाद्य सामग्री, पोर्टेबल जेनेरेटर, पानी शुद्धीकरण ट्याब्लेट तथा अन्य प्राविधिक सामग्री पठाइसकेको थियो।
भारतले राहत सामग्रीसँगै क्षतिग्रस्त सडक तथा पुल पुनः सञ्चालनमा ल्याउन पूर्वाधार निर्माणमा समेत सहयोग अघि बढाएको छ। २३० फिट लामो सिंगल लेन मोड्युलर स्टिल ब्रिज निर्माणका उपकरण बोकेका १६ वटा भारतीय ट्रक नेपाल पुगिसकेका छन्। थप सात वटा बेली ब्रिज निर्माणका लागि आवश्यक सामग्री र जडान गर्ने प्राविधिक टोलीसमेत पठाउने तयारी भइरहेको छ।
चौथो उडानसँगै भारतले हवाईमार्फत नेपाल पठाएको राहत सामग्रीको कुल मात्रा ६८.५ टन पुगेको छ। भारतले बाढीपहिरो प्रभावित क्षेत्रमा खोज तथा उद्धारदेखि सडक तथा पुल पुनःस्थापनासम्म आवश्यक सहयोग जारी राख्ने जनाएको छ।
यसैबीच, भोटेकोशी नदीमा पानीको बहाव र आवाज पुनः बढेको भन्दै नेपालका सम्बन्धित निकायले नदी आसपास तथा तल्लो तटीय क्षेत्रमा रहेका बासिन्दा र उद्धार टोलीलाई सतर्क रहन आग्रह गरेका छन्। बाढीपछि प्रभावित क्षेत्रमा खोज तथा उद्धार कार्य अझै चुनौतीपूर्ण अवस्थामा रहेको छ।
“नेपालको उद्धारमा भारतको थप साथ : ११ टन राहतसहित सुरुङ उद्धार र फरेन्सिक टोली काठमाडौँमा”
“राहत मात्रै होइन, पुनःनिर्माणमा पनि भारतको सहयोग : ६८.५ टन सामग्री, पुल निर्माण टोली नेपालमा”
