भोटेकोशी बाढीमा बेपत्ता इन्जिनियर सिंहको १३ दिनसम्म अत्तोपत्तो छैन

जनकपुरधाम– रसुवाको भोटेकोशीमा आएको विनाशकारी बाढीपछि सम्पर्कविहीन भएका इन्जिनियर अजयप्रसाद सिंहको १३ दिन बितिसक्दा पनि अवस्था अज्ञात रहेपछि परिवारमा चिन्ता बढेको छ ।

रसुवास्थित युटी २१६ मेगावाट डुसन पावर हाउसमा कार्यरत इन्जिनियर सिंह गत भदौ १० गते आएको बाढीपछि बेपत्ता भएका हुन् । उनको खोजी तथा उद्धारमा थप प्रभावकारी पहल गर्न परिवारले सरकार र सम्बन्धित निकायसँग आग्रह गरेको छ ।

जनकपुरधाम निवासी सिंहकी श्रीमती पूजा साहले स्थलगत रूपमा ड्रोन र प्रभावकारी उद्धार टोली परिचालन गरी श्रीमान्को खोजी गर्न सरकारसँग भावुक अपिल गरेकी छन् ।

श्रीमान् जीवितै र सकुशल रहेको विश्वासमा रहेकी पूजाले सामाजिक सञ्जालमार्फत भावुक सन्देश लेख्दै भनेकी छन्, “तिमी जहाँ छौ, जस्तै छौ, मलाई खबर गर । म आफैँ आउँछु तिमीलाई लिन । बस्, एकपटक तिम्रो आवाज सुन्न र तिमीलाई देख्न पाऊँ ।”

उनले सानी छोरीसमेत बुबाको भिडियो कल र आवाजको पर्खाइमा रहेको बताएकी छन् ।

सिंहको खोजीका लागि परिवारले मैलुङ बजार, क्याम्प आसपास, ठाडेगाउँ, राम्चे, ग्राङ, कालिकास्थान, धुन्चे र मैलुङडाँडालगायतका जंगल तथा पहाडी क्षेत्रमा ड्रोन र पर्याप्त जनशक्ति परिचालन गर्न माग गरेको छ ।

सरकार तथा सम्बन्धित निकायबाट आश्वासन पाए पनि समयमा उद्धार टोली घटनास्थलमा नपुगेको परिवारको गुनासो छ । पूजाले दिनभर कार्यालय धाउँदा–धाउँदै आफूहरू थाकिसकेको बताउँदै “हामीलाई आश्वासन होइन, तत्काल उद्धार चाहिएको छ” भनेकी छन् ।

मधेसका १८० जना अझै सम्पर्कविहीन

यसैबीच, भोटेकोशी बाढीमा परेर मधेस प्रदेशका मात्रै २२० जना हराएकामा अहिलेसम्म ३८ जना सम्पर्कमा आएका छन् ।

मधेस प्रदेश प्रहरी कार्यालयका वरिष्ठ प्रहरी उपरीक्षक (एसएसपी) प्रभुप्रसाद ढकालका अनुसार बेपत्तामध्ये दुई जनाको शव फेला परेको छ भने १८० जना अझै सम्पर्कविहीन छन् । प्रहरीले बेपत्ताको खोजी तथा अवस्थाबारे आवश्यक समन्वय गरिरहेको जनाएको छ ।