जेन–जी आन्दोलनपछि भाटभटेनी पुरानै लयमा फर्किँदै, १७ स्टोर पुनः सञ्चालनमा

काठमाडौं– जेन–जी आन्दोलनमा प्रदर्शनकारीको प्रमुख निशानामा परेको व्यावसायिक प्रतिष्ठान भाटभटेनी सुपरमार्केट एक वर्षमै पुरानो लयमा फर्किने प्रयासमा जुटेको छ ।

देशकै ठूलो व्यापारिक चेन भाटभटेनीका २८ मध्ये १२ वटा स्टोरमा आगजनी भएको थियो । त्यस्तै, नौवटा स्टोरमा तोडफोड तथा लुटपाट भएको थियो । आन्दोलनका क्रममा २१ वटा स्टोरमा क्षति पुगेकोमा हालसम्म १७ वटा स्टोर पुनः सञ्चालनमा आइसकेका छन् ।

तोडफोड तथा लुटपाट भएका शाखा यसअघि नै सञ्चालनमा आइसकेका छन् भने आगजनीबाट ध्वस्त भएका १२ मध्ये आठवटा शाखा पनि पुनः सञ्चालनमा आएका छन् ।

सुनसरीको धरान, काठमाडौंको नक्साल, मकवानपुरको हेटौँडा र झापाको दमक शाखा भने पुनः सञ्चालनको तयारीमा छन् । भाटभटेनीले असोज मसान्तसम्म यी शाखासमेत सञ्चालनमा ल्याउने योजना बनाएको छ ।

आन्दोलनका क्रममा काठमाडौं उपत्यकाका महाराजगञ्ज, बौद्ध, कोटेश्वर, बालुवाटार वायरहाउस र नक्साल शाखाका साथै उपत्यकाबाहिर पोखरा, चितवन, हेटौँडा, बिर्तामोड, दमक, विराटनगर र धरान शाखा आगजनीबाट ध्वस्त भएका थिए ।

त्यस्तै, कलंकी, ठिमी, बालाजु, जनकपुर, बुटवल, वीरगञ्ज, धनगढी, इटहरी र भैरहवा शाखामा आगजनी नभए पनि तोडफोड तथा लुटपाट भएको थियो । टोखा, सातदोबाटो, अनामनगर, सानो गाउँ, वर्ल्ड ट्रेड सेन्टर, पाटन र नेपालगञ्जस्थित भाटभटेनीका स्टोर भने सुरक्षित रहेका थिए ।

आन्दोलनपछि क्षतिग्रस्त शाखाहरूको पुनर्निर्माण तथा पुनर्स्थापनालाई प्राथमिकता दिँदै कम्पनीले व्यवसायलाई पुनः लयमा ल्याउने प्रयास गरेको छ ।

जेन–जी आन्दोलनले भाटभटेनीको भौतिक संरचनासँगै वित्तीय व्यवस्थापन र व्यवसाय विस्तारमा समेत तत्कालीन दबाब सिर्जना गरेको थियो । तर, एक वर्षको अवधिमा कम्पनी पुनः नियमित व्यावसायिक गतिविधितर्फ फर्किन थालेको छ ।

भाटभटेनीले पुनर्निर्माणमार्फत व्यवसायलाई पुरानै लयमा फर्काउनुका साथै अब ‘अन्तर्राष्ट्रिय मोडल’मा सञ्चालन गर्ने योजना अघि बढाएको छ । सोही योजनाअन्तर्गत भक्तपुरस्थित राधेराधे शाखामा भाटभटेनीले रात्रिकालीन सेवा पनि सुरु गरेको छ ।