भोटेकोशी बाढीका शव पहिचान गर्न डिएनए परीक्षण तीव्र

रुपन्देही– भोटेकोशी बाढीमा परी मृत्यु भएका नेपाली तथा विदेशी नागरिकका शवको पहिचानका लागि नेपाल प्रहरीले डिएनए नमुना सङ्कलन तथा परीक्षणलाई तीव्रता दिएको छ । शव पहिचानमा हुन सक्ने त्रुटि न्यूनीकरण गर्न प्रहरीले आधुनिक फोरेन्सिक विधिबाट नमुना परीक्षण अघि बढाएको हो ।

सामाखुशीस्थित नेपाल प्रहरी केन्द्रीय विधि विज्ञान प्रयोगशालाले बाढी प्रभावित क्षेत्र तथा मृतकका आफन्तबाट प्राप्त डिएनए नमुनाको परीक्षण गरिरहेको छ । नमुना सङ्कलन, भण्डारणदेखि परीक्षणसम्मका प्रक्रियामा वैज्ञानिक मापदण्ड र आधुनिक प्रविधि प्रयोग गरिएको प्रहरीले जनाएको छ ।

प्रहरी प्रवक्ता प्रहरी नायब महानिरीक्षक अभिनारायण काफ्लेले विपद्पछिको खोज तथा उद्धारसँगै शव पहिचानलाई पनि प्राथमिकतामा राखिएको जानकारी दिनुभयो । प्रयोगशालाका प्रमुख प्रहरी वरिष्ठ उपरीक्षक योगबहादुर पालका अनुसार बाढी प्रभावित क्षेत्रबाट मृतकका नमुना तथा आफन्तबाट सङ्कलित नमुना आउने क्रम जारी छ ।

उहाँका अनुसार सङ्कलित नमुनालाई सुरक्षित भण्डारण गरी मानक प्रक्रियाअनुसार डिएनए परीक्षण गर्न टोली अहोरात्र खटिएको छ । प्रयोगशालामा हालसम्म प्राप्त १ हजार २४० नमुनामध्ये ८०८ वटा रगतका नमुना, ३४८ वटा दाँत तथा हड्डीका नमुना र ८४ वटा औँलाछापका नमुना रहेका छन् । हालसम्म २६ जिल्लाबाट डिएनए प्रोफाइलिङका लागि नमुना प्राप्त भएको प्रहरीले जनाएको छ ।

पछिल्लो तथ्याङ्कअनुसार शव पहिचानका लागि मृतकका १ हजार २८६ र आफन्तका १ हजार ४१२ गरी कुल २ हजार ६७८ डिएनए नमुना सङ्कलन भइसकेको छ ।

मृतकका सङ्कलित नमुनामध्ये चितवनबाट ३५४, नवलपरासी पश्चिमबाट २१३, नुवाकोटबाट २०७, नवलपरासी पूर्वबाट १९९, रसुवाबाट १३४, गोरखाबाट ७१, धादिङबाट ७० र तनहुँबाट ३८ वटा रहेका छन् ।

यसैगरी, नेपाल प्रहरी अस्पतालमा हालसम्म ९९० जना मृतकका आफन्तको नमुना सङ्कलन गरिएको छ । अन्य जिल्लामा पनि नमुना सङ्कलन कार्य जारी रहेको प्रहरीले जनाएको छ ।

भोटेकोशी बाढीपछि सम्पर्कविहीन तथा हराइरहेका नेपाली र विदेशी नागरिकको पहिचानका लागि डिएनए प्रोफाइलिङको दायरा फराकिलो बनाइएको छ । बाढीमा भेटिएका शव वा शरीरका अङ्गको डिएनएलाई सम्भावित आफन्तको नमुनासँग तुलना गरी पहिचान यकिन गर्ने प्रक्रिया अघि बढाइएको प्रहरीले जनाएको छ ।

प्रहरी महानिरीक्षक दानबहादुर कार्कीले शव पहिचान तथा डिएनए परीक्षणलाई वैज्ञानिक विधि र मापदण्डअनुसार उच्च प्राथमिकताका साथ सम्पन्न गर्न निर्देशन दिनुभएको छ । प्रहरी प्रधान कार्यालयका प्रहरी उपरीक्षक धर्मराज भण्डारीका अनुसार नमुना सङ्कलनदेखि परीक्षणसम्मको कार्यलाई व्यवस्थित बनाइएको छ ।