यामालको दुई गोलमा बार्सिलोनाको फराकिलो जित, भ्यालेन्सिया ५–० ले पराजित

काठमाडौं– स्पेनिस युवा स्टार लामिन यामालको उत्कृष्ट दुई गोलको मद्दतमा बार्सिलोनाले ला लिगामा भ्यालेन्सियामाथि ५–० को फराकिलो जित निकालेको छ। भ्यालेन्सियाको घरेलु मैदानमा आइतबार राति भएको खेलमा यामालले यस सिजन ला लिगामा गोलको खाता खोले।

खेलको छैटौँ मिनेटमै प्राप्त पासलाई १९ वर्षीय यामालले उत्कृष्ट टो–पिकमार्फत गोलमा परिणत गर्दै बार्सिलोनालाई सुरुआती अग्रता दिलाए। गोल गरेपछि उनले औँला मुखमा राखेर आफ्नो चार वर्षीय भाइ केयनलाई गोल समर्पित गरेका थिए। खेल हेर्न यामालकी आमा र भाइ रङ्गशालामै उपस्थित थिए।

बार्सिलोनाका लागि फर्मिन लोपेज, राफिन्हा र रोड्रीले थप एक–एक गोल गरे। खेलको ८४औँ मिनेटमा डानी ओल्मोको पासमा यामालले बायाँ खुट्टाले व्यक्तिगत दोस्रो गोल गर्दै बार्सिलोनाको ५–० को शानदार जित सुनिश्चित गरे।

यस जितसँगै बार्सिलोनाले ला लिगामा लगातार चौथो जित निकाल्दै शीर्ष स्थान कायमै राखेको छ। चोटका कारण अघिल्लो सिजनका अन्तिम केही खेल गुमाएका यामालले यसै गृष्मकालीन विश्वकपमा स्पेनलाई दोस्रोपटक उपाधि दिलाउने क्रममा महत्त्वपूर्ण भूमिका खेलेका थिए।