नेपालका लागि भारतले पठायो पाँचौँ सैन्य विमान, ५.५ टन औषधिसहित उद्धार टोली

काठमाडौँ– छिमेकी मुलुक भारतले नेपालमा जारी खोज, उद्धार तथा राहत कार्यका लागि पाँचौँ सैन्य विमान पठाएको छ । भोटेकोशीमा आएको भीषण बाढीबाट प्रभावित क्षेत्रमा उद्धार तथा राहत कार्यमा सहयोग पुर्‍याउन भारतले अत्यावश्यक सामग्रीसहित सैन्य विमान नेपाल पठाएको हो ।

भारतीय विदेशमन्त्री डा. एस. जयशंकरले सामाजिक सञ्जाल एक्समार्फत भारतबाट राहत सामग्रीसहितको पाँचौँ विमान नेपालका लागि प्रस्थान गरेको जानकारी दिएका छन् ।

उनका अनुसार भारतीय वायुसेनाको उक्त विमानमा ११ जना विज्ञ सम्मिलित खोज तथा उद्धार टोली, अत्याधुनिक खोज तथा उद्धार उपकरण र ५.५ टन अत्यावश्यक औषधि पठाइएको छ ।

नेपालमा भोटेकोशीमा आएको भीषण बाढीपछि प्रभावित क्षेत्रमा खोज तथा उद्धार कार्य जारी रहेका बेला भारतले राहत तथा उद्धार सामग्रीको आपूर्ति बढाएको हो । भारतीय पक्षले नेपालमा आवश्यक पर्ने सामग्री तथा जनशक्ति उपलब्ध गराउने क्रमलाई निरन्तरता दिएको जनाएको छ ।

विमानमार्फत ल्याइएका राहत सामग्री तथा उद्धार टोलीलाई विमानस्थलबाट प्रभावित क्षेत्रसम्म पुर्‍याउन आवश्यक समन्वय भइरहेको छ । उद्धार टोलीले अत्याधुनिक उपकरणको प्रयोग गरी खोज तथा उद्धार कार्यमा सहयोग गर्ने जनाइएको छ ।

यसअघि पनि भारतले नेपालमा उद्धार टोली, राहत सामग्री तथा चिकित्सकीय टोली विभिन्न सैन्य विमानमार्फत पठाइसकेको छ ।

भोटेकोशी बाढीबाट प्रभावित क्षेत्रमा उद्धार, घाइतेको उपचार, शव व्यवस्थापन तथा राहत वितरणका लागि नेपाल सरकारसँग समन्वय गर्दै भारतले थप सहयोग उपलब्ध गराएको हो । पाँचौँ सैन्य विमानमार्फत आएको सहयोगले प्रभावित क्षेत्रमा जारी खोज तथा उद्धार कार्यमा थप सहयोग पुग्ने अपेक्षा गरिएको छ ।